NADHAM "RUKÖN SEMBAHYANG" LAM BAHSA ACEH

RUKÖN SEMBAHYANG

(GEUPOSTING LE TGK EDI SYUHADA, S.S)

Rukön sembahyang jinoe lön peugah

Nibak jumlah na lhèè blah saja

Pertama niet dua berdiri

Lhè teukeubi rukön jih na

Pheut fatihah dalam sembahyang

Ruku’ limöng bak bicara

Nam I’tidal tujöh sujud

Lapan taduek dua antara

Sikureung duek tahyeut akhe

Siplöh hasé tahyeut ta baca

Siblah seulaweut dua blah saleum

Lhè blah tamam teureutib jihna

Rukön lhè blah geubagi lhè

Pham beuténthè maséng jeumba

Di Qalbi ta’lök saboh

Niet beutugoh di dalam dada

 Limöng pubuet nan di Qauliy

Phön teukeubi lhueh ta mula

Dua Fatihah Al-hamdulillah geukheun nama

Lhè tahyeut pheut seulaweut 

saleum teuma limong peukara

Nyang limong nyan buet jilidah

Jinoe lön peugah buet anggota

Geukheun Fi’liy nyan keuh tuböh

Dijih tujöh jikeureuja

Nyang phön tadong dua ruku’

Lhè beudoh cot piyöh siat siklép mata

Keupheut sujud nibak teumpat

Piyöh siat bak mushalla

Nyang keulimong duek antara dua sujud

Nam duek tahyeut tujöh teuretib bak meutuka

Nadham Nyoe Keuneubah Ulama Awai, Kamoe Teurimong, Kamoe Meurunoe ngon Kamoe Hafai Nibak Gure-Gure Yoh Wate Kamoe Mantong Cut...
Kamoe Lake Nibak Droe Neuh Nyang Heut Neupeuguna Nadham Nyoe,  Neuhadiah Pahla Fatihah Sigoe Troh Keu Ulama Ngon Teungku-Teungku Nyang Ka Geutem Peutimang ngon Geukembang Nadham Nyoe, Sampoe Troh an Geutanyoe Uroe Nyoe..Nibak Allah Po Teuh Sidroe ta Meulake Beuroh Mate Geutanyoe lam Taat, Beugeupeusahoe Geutanyoe Roh Lam Kawan Ulama, Ureung-Ureung Shaleh, Aulia Allah, Shiddiqin, Meunan Cit Sajan Saidil Mursalin Nabi Muhammad nibak Uroe Dudoe…Amiin-Amin Ya Rabbal ‘Alamin

Geupeusaho ngon Geutuleh Kelai Le Ureung Hina Teungku Edi Syuhada, Salah Sidroe Khadam Thalabah Bak Dayah“Darul Ihsan” Abu Krueng Kalee